”咁嘅戲”

 

撰文:幫人打字機   2020-05-15 11:23 最後更新日期:2020-05-15 11:24

「呢條友成日拍埋啲咁嘅戲嘅!」

呢句說話,出自我一個女性朋友口中。

 

當時我喺一個好chill嘅地方,聽歌飲嘢睇戲傾計嘆水煙,的確係好忙,但同時好chill,而呢位女友人係呢個地方嘅水煙師。

 

當時Projector播緊一套港產單元網劇,一套標榜”貼地”嘅劇集,劇中內容主要都係圍繞性愛。

 

女友人做做吓嘢行過見到,就忍唔住爆咗句「呢條友成日拍埋啲咁嘅戲嘅!」

 

此話一出,全場即時起哄,皆因戲中嘅男主角,當時就喺現場,仲要喺正佢身邊嗰枱!

 

呢個時候佢先發現到嗰位男主角,佢當住人哋面,講出咗真心話!然後佢即刻尷尬解釋:「唔係呀,我唔知佢喺度吖嘛...」。越描越黑,呢個時候講咩都用,真係嗌破喉嚨都唔會有人理你!

 

但呢件事令我反思,令我想探討嘅係:究竟咩叫做「咁嘅戲」呢?

 

「咁嘅戲」,好明顯係一個帶有貶義嘅講法。係咪即係覺得佢Low class?覺得Cheap?覺得又係啲咸濕戲?

 

彷彿同性愛有關嘅港產戲,就會令人皺眉,嗤之以鼻。到底係性愛令部戲低俗咗,定係啲戲影響咗大家對性愛嘅觀感呢?

 

事實係both,而且仲要成為咗惡性循環。

 

回想近年港產影視作品對性愛嘅描寫,就會發現端倪。

 

性愛喺電影入面,十之八九都會引起壞事,帶嚟壞結果,輕則成身咖喱雞驚俾人發現,重則意外懷孕、出軌、斷片,甚至全部一齊嚟,飲醉酒之後出軌仲要斷埋片搞到成身咖喱雞再意外懷孕!

 

點解會引起壞事?因為喺電影入面,性,往往係不理智、係fuck up、係失控,甚至係一種壞習慣。喜歡性愛嘅角色就一定係fuck up係壞係濫交,將淫亂同性開放混為一談。有性需要就係飢渴,係淫。有性癖就係變態,而且性癖仲只係得一種,一定係SM,最後就變成SM等於變態!角色之間好多時都因為性而互相欺騙,結果又往往都會東窗事發,六國大封相。

 

描寫角度既狹隘又不公平。

 

呢一切一切,都會潛移默化,令觀眾自然而然咁將”性愛”同”壞事”掛鉤。而當大部分人咁諗,啲戲又好自然會繼續咁拍,越多戲係咁,觀眾嘅印象又會更深,如是者,惡性循環。然後,”性愛”,淪為吸引眼球嘅爆點,低俗嘅載體,遭人嫌棄。

 

不過,我以上所講嘅只係一部分嘅港產流行作品,並非100%都係咁,外國將性描述得好嘅作品雖然真係比較多,但都唔代表外國冇劣作,更唔代表港產冇佳作。

 

喺呢個專欄,我將會同大家討論或者評論一啲同性有關嘅影視作品。不論係電影、劇集、動畫、真人show,只要同性有關,我就會拎出嚟講。當然亦都十分歡迎讀者推介啲作品俾我欣賞吓,互相交流啦!多多指教!